ଚାଇନା ପରେ ଭାରତ ବିଶ୍ୱର ଦ୍ୱିତୀୟ ସର୍ବବୃହତ୍ ଇଣ୍ଟରନେଟ୍ ବ୍ୟବହାରକାରୀ ରାଷ୍ଟ୍ର। ଏଠାରେ ୪୮ କୋଟି ଲୋକ ଇଣ୍ଟରନେଟ୍ ବ୍ୟବହାର କରୁଥିବା ବେଳେ ଚାଇନାରେ ଏହି ସଂଖ୍ୟା ରହିଛି ୭୭ କୋଟି। ସାଧାରଣରେ ଭାରତୀୟଙ୍କ ପାଇଁ ଇଣ୍ଟରନେଟ୍ ବ୍ୟବହାରର ଅର୍ଥ ହେଉଛି ସୋସିଆଲ ମିଡିଆ ବ୍ୟବହାର। କିନ୍ତୁ ଭାରତରେ ସୋସିଆଲ ମିଡିଆ ଜରିଆରେ ପୋଷ୍ଟ କରାଯାଉଥିବା ତଥ୍ୟ ଓ ତାହାକୁ ନେଇ ଉପୁଜୁଥିବା ବିବାଦ ସମ୍ଭବତଃ ବିଶ୍ୱରେ ସର୍ବାଧିକ। ଦେଖିବାକୁ ଗଲେ ସୋସିଆଲ ମିଡିଆ ବ୍ୟକ୍ତିଗତ, ରାଜନୈତିକ ଓ ବ୍ୟବସାୟିକ ଦିଗକୁ ପ୍ରଭାବିତ କରିଚାଲିଛି। ଫେସ୍ବୁକ୍ରୁ ବ୍ୟକ୍ତିଗତ ତଥ୍ୟ ନେଇ କେମ୍ବ୍ରିଜ୍ ଆନାଲିଟିକା ଭାରତ ଓ ଆମେରିକା ସମେତ ଅନେକ ରାଷ୍ଟ୍ରର ରାଜନୈତିକ ପାଣିପାଗକୁ କିଭଳି ପରିବର୍ତ୍ତନ କରିଥିଲା, ତାହା ନିକଟରେ ପ୍ରଘଟ ହେବା ପରେ ପୃଥିବୀବ୍ୟାପୀ ହଇଚଇ ସୃଷ୍ଟି ହୋଇଛି। ପ୍ରଧାନମନ୍ତ୍ରୀ ନରେନ୍ଦ୍ର ଦାମୋଦରଦାସ ମୋଦି କେମ୍ବ୍ରିଜ୍ ଆନାଲିଟିକାର ତଥ୍ୟକୁ ହାତେଇ ରାଜନୈତିକ ସଫଳତା ପାଇଛନ୍ତି ବୋଲି କଥା ଉଠିଛି। ଅନୁରୂପ ଭାବେ କଂଗ୍ରେସ ବିରୋଧରେ ମଧ୍ୟ ଅଭିଯୋଗ ଆଣିଛି ଭାଜପା। ଇତିମଧ୍ୟରେ ଫେସ୍ବୁକ୍ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (ସିଇଓ) ମାର୍କ ଜୁକରବର୍ଗ କେମ୍ବ୍ରିଜ୍ ଆନାଲିଟିକା ଫେସ୍ବୁକରୁ ଉଦ୍ଧୃତ କରିଥିବା ତଥ୍ୟ ବ୍ୟବହାର ବିଷୟକୁ ଜାଣି ତ୍ରୁଟି ସୁଧାରିବେ ବୋଲି କହିବା ସହ କ୍ଷମା ମାଗିଛନ୍ତି। ଏଠାରେ ଉଲ୍ଲେଖଯୋଗ୍ୟ, ଆମେ ଭାରତୀୟ ଏ ପର୍ଯ୍ୟନ୍ତ ଅନ୍ତରଙ୍ଗ ତଥ୍ୟ ଆଧାର ଓ ବିଭିନ୍ନ ସ୍ଥାନରେ ଦେଇ ଆସୁଥିବା ସତ୍ତ୍ୱେ ତାହାର ଅପବ୍ୟବହାର ଦିଗକୁ ବୁଝିବାରେ ଅକ୍ଷମ। ସେଥିପାଇଁ ତଥ୍ୟ ଚୋରି ଘଟଣା ଭାରତରେ ବଢ଼ିବାରେ ଲାଗିଛି। ଜୁକରବର୍ଗ କହିଛନ୍ତି ଯେ ଫେସ୍ବୁକ୍ ଏବେ ଏହାର ନିରାପତ୍ତାକୁ ଅଧିକ କଡ଼ାକଡ଼ି କରି ଭାରତ ସମେତ ଅନ୍ୟ ରାଷ୍ଟ୍ରଗୁଡ଼ିକର ନିର୍ବାଚନରେ କିଭଳି ସ୍ବଚ୍ଛତା ବଜାୟ ରଖି ହେବ ସେ ଦିଗରେ କାର୍ଯ୍ୟ କରିବ। ହେଲେ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ ନିଜ ଟୁଇଟ୍ରେ ପ୍ରଧାନମନ୍ତ୍ରୀଙ୍କ ବିରୋଧରେ କହିବାକୁ ଯାଇ ଉଲ୍ଲେଖ କରିଛନ୍ତି ଯେ ‘ନମୋ ଆପ୍’ ଜରିଆରେ ସଂଗୃହୀତ ତଥ୍ୟକୁ ମୋଦି ଆମେରିକୀୟ କମ୍ପାନୀକୁ ପ୍ରେରଣ କରୁଛନ୍ତି। ଉଲ୍ଲେଖଯୋଗ୍ୟ, ‘ନମୋ ଆପ୍’ ହେଉଛି ଏକ ଆପ୍ଲିକେଶନ ଯାହା ଜରିଆରେ ମୋଦି ସରକାରୀ ଯୋଜନା ସମ୍ପର୍କିତ ତଥ୍ୟ ଆଦାନପ୍ରଦାନ କରିଥାନ୍ତି। ଏହାସହ ସେ ତାଙ୍କ ଦୈନନ୍ଦିନ କାର୍ଯ୍ୟକ୍ରମ ସମ୍ପର୍କରେ ବ୍ୟବହାରକାରୀଙ୍କୁ ମେସେଜ୍ ଓ ଇ-ମେଲ୍ ଜରିଆରେ ପ୍ରତ୍ୟକ୍ଷ ଭାବେ ଅବଗତ କରାଇଥାନ୍ତି। ରାହୁଲ ଆହୁରି କହିଛନ୍ତି ଯେ, ଭାରତୀୟଙ୍କ ଉପରେ ଗୋଇନ୍ଦା ନଜର ରଖିବାରେ ମୋଦି ପ୍ରମୁଖ ଭୂମିକା ଗ୍ରହଣ କରିଛନ୍ତି। ଅନ୍ୟପକ୍ଷରେ କଂଗ୍ରେସ ସିଙ୍ଗାପୁର ସର୍ଭରକୁ ତଥ୍ୟ ପଠାଉଛି ବୋଲି ଭାଜପା ଅଭିଯୋଗ ଆଣି ରାହୁଲଙ୍କୁ ସମାଲୋଚନା କରିଛି। ସଂଗୃହୀତ ତଥ୍ୟର ଦୁରୁପଯୋଗକୁ କିଭଳି ରୋକାଯାଇପାରିବ ତାହା ଉପରେ ଜୁକରବର୍ଗ ଚିନ୍ତିତ ହୋଇପଡ଼ିଥିବା କହୁଛନ୍ତି। କିନ୍ତୁ ଆଜିର ଦୁନିଆରେ ବ୍ୟକ୍ତିଗତ ତଥ୍ୟକୁ ଆଧାର କରି ବହୁତ ବଡ଼ ବ୍ୟବସାୟିକ ସଂସ୍ଥା ଗଢ଼ି ଉଠିଲାଣି। କେବଳ ଫେସ୍ବୁକ୍ ନୁହେଁ, ତାହା ସହ ଗୁଗୁଲ୍ ଓ ଆହୁରି ଅନେକ ଇଣ୍ଟରନେଟ୍ ସଂସ୍ଥା ଲାଗିପଡ଼ି ଏହିସବୁ ବ୍ୟକ୍ତିଗତ ତଥ୍ୟ ପ୍ରତ୍ୟେକ ଦେଶରୁ ସଂଗ୍ରହ କରୁଛନ୍ତି। ଅନୁରୂପ ଭାବେ କେମ୍ବ୍ରିଜ୍ ଆନାଲିଟିକା ମଧ୍ୟ ଗୋଟିଏ ଏକାକୀ କମ୍ପାନୀ ନୁହେଁ, ତାହାରି ଭଳି ଆହୁରି ଅନେକ ବ୍ୟବସାୟିକ ସଂସ୍ଥା ବଜାରରେ କାର୍ଯ୍ୟ କରିବାକୁ ଆରମ୍ଭ କଲେଣି। ଏମାନଙ୍କର ମୁଖ୍ୟ କାର୍ଯ୍ୟ ହେଉଛି ‘ଡାଟା ମାଇନିଂ’। ମାଟିତଳୁ ଲୁହାପଥର କିମ୍ବା କୋଇଲା ଖନନ ଭଳି ଏହି କମ୍ପାନୀଗୁଡ଼ିକ ପ୍ରତ୍ୟେକ ବ୍ୟକ୍ତିବିଶେଷର ସବୁ ତଥ୍ୟ ଖନନ କରିବାରେ ମାତି ଯାଇଛନ୍ତି। ଏହି ବ୍ୟବସାୟ ଏବେ ଅନେକ ହଜାର ବିଲିୟନ ଡଲାରର ଲାଭ ଦେଇପାରୁଛି। ଅନ୍ୟପକ୍ଷରେ ଭାରତର ପର୍ଯ୍ୟଟନ ମନ୍ତ୍ରୀ କେ. ଜେ. ଆଲ୍ଫୋନ୍ସ ଆଧାର ପାଇଁ ତଥ୍ୟ ଦେବାରେ କୁଣ୍ଠିତ ହେଉଥିବା ଦେଶବାସୀଙ୍କୁ ସମାଲୋଚନା କରିଛନ୍ତି। ସେ କହିଛନ୍ତି ଯେ, ବିଦେଶ ଗସ୍ତ ବେଳେ ଗୋରା ଅଧିକାରୀଙ୍କ ଆଗରେ ଭାରତୀୟମାନେ ବିବସ୍ତ୍ର ହେବାକୁ ପଛାଉ ନାହାନ୍ତି। ଆମେରିକାର ଭିଜା ଫର୍ମରେ ୧୦ ପୃଷ୍ଠା ପୂରଣ କରିବାରେ ଅସୁବିଧା ହେଉନାହିଁ। କିନ୍ତୁ ଭାରତରେ ସରକାର ତଥ୍ୟ ମାଗିଲେ ସେମାନେ ସମସ୍ୟା ସୃଷ୍ଟି କରୁଛନ୍ତି। ଉଲ୍ଲେଖଯୋଗ୍ୟ, ଆଲ୍ଫୋନ୍ସ ଉଭୟ ଗୃହର ସଦସ୍ୟ ନ ଥିବା ବେଳେ ମୋଦିଙ୍କ ମନ୍ତ୍ରିମଣ୍ଡଳର ତୃତୀୟ ସମ୍ପ୍ରସାରଣ ବେଳେ ସାମିଲ ହୋଇଥିଲେ। ପୂର୍ବତନ ଅମଲାତନ୍ତ୍ରୀ ଭାବେ ଆଲ୍ଫୋନ୍ସଙ୍କ ଅଭିଜ୍ଞତା ଚାକିରି ଦୁନିଆରେ ସୀମିତ ରହିଛି। ଦେଶବାସୀଙ୍କ ବ୍ୟକ୍ତିଗତ ତଥ୍ୟ ଚୋରି ହୋଇ କର୍ପୋରେଟ୍ ଦୁନିଆକୁ କିଭଳି ବିକ୍ରି ହେଉଛି ତାହା ଉପରେ ତାଙ୍କର ଧାରଣା ନାହିଁ। ତେଣୁ ଆଧାରର ବୈଧତାକୁ ନେଇ ଯେଉଁମାନେ ପ୍ରଶ୍ନ ଉଠାଉଛନ୍ତି ସେମାନଙ୍କୁ ସମାଲୋଚନା କରୁଛନ୍ତି। ଏଭଳି ପ୍ରଚ୍ଛଦପଟରେ କୁହାଯାଇପାରେ ଯେ ଯେତେବେଳେ ଫେସ୍ବୁକ୍ ପରି ଏକ ଶକ୍ତିଶାଳୀ ସୋସିଆଲ ମିଡିଆ ପ୍ଲାଟଫର୍ମର ତଥ୍ୟକୁ ଚୋରାଇ ନିଆଯାଇପାରୁଛି, ସେତେବେଳେ ଭାରତୀୟ ଟେକ୍ନୋକ୍ରାଟ୍ଙ୍କ ଦ୍ୱାରା ଅତି ଦୁର୍ବଳ ଭାବେ ପ୍ରସ୍ତୁତ ଆଧାର କାର୍ଡ ତଥ୍ୟ ସହଜରେ ହସ୍ତାନ୍ତରଯୋଗ୍ୟ। ନିକଟ ଅତୀତରେ ଆଧାର ତଥ୍ୟ ପ୍ରଘଟ ହେବାର ଅନେକ ପ୍ରମାଣ ମିଳିଛି। ଦେଖାଯାଉଛି ସାଧାରଣ ଭାରତୀୟ ସରକାରୀ ସୁବିଧା ପାଇବା ପାଇଁ ସେମାନଙ୍କ ସମସ୍ତ ବ୍ୟକ୍ତିଗତ ତଥ୍ୟ ଦେଇଦେବାକୁ ପ୍ରସ୍ତୁତ ହେଉଛନ୍ତି। ଯେଉଁ ଦେଶରେ ଲୋଭର ବଶବର୍ତ୍ତୀ ହୋଇ କେତେକ ଲୋକ ସେମାନଙ୍କ ବ୍ୟାଙ୍କ ଆକାଉଣ୍ଟ ଓ ବିଭିନ୍ନ କାର୍ଡର ପିନ୍କୁ ଫୋନ୍ କରିଥିବା ଦଲାଲକୁ ଦେଇଦେଉଛନ୍ତି, ସେହି ଦୃଷ୍ଟିରୁ ଦେଖିଲେ କୌଣସି ସ୍ବାର୍ଥ ହାସଲ ପାଇଁ ସବୁଯାକ ବ୍ୟକ୍ତିଗତ ତଥ୍ୟ ଦେବାରେ କୁଣ୍ଠିତ ହେଉନାହାନ୍ତି। ଆଜିର ନେତୃତ୍ୱ ଭାରତୀୟଙ୍କ ନାଡ଼ି ଚିପି ସାରିଥିବାରୁ ସେମାନଙ୍କ ପସନ୍ଦ ଓ ଆବଶ୍ୟକତାକୁ ଦେଖି ତଥ୍ୟ ସଂଗ୍ରହ କରୁ୍ଛନ୍ତି। ଫଳରେ ତାହା ବିକ୍ରିଯୋଗ୍ୟ ହୋଇପାରୁଥିବା ବେଳେ ରାଜନୈତିକ ଦୃଷ୍ଟିକୋଣରୁ ସେମାନଙ୍କୁ ସହାୟକ ହେଉଛି। ସଚେତନ ନ ହେଲେ ଭାରତୀୟମାନେ ବିଶ୍ୱ ବଜାରରେ କ୍ରୀତଦାସ ଭାବେ ବିକ୍ରି ହୋଇଯିବେ।
-dharitri.com
